Украина Олий радасига сайловларда «Порошенко блоки» етакчилик қилмоқда

Украинада Олий радага сайловлар якунланди, дея хабар бермоқда Rbc.ru.

Миллий эксит-полл маълумотларига кўра, «Пётр Порошенко блоки» овозларнинг 23 фоизини тўплаб сайловларда ғолиб бўлди. Кейинги ўринларни Арсений Яценюкнинг «Халқ фронти» (21,3%), Андрей Садовийнинг «Ўз-ўзига кўмак» (13,2%) партиялари эгаллади. Шунингдек, Юлия Тимошенконинг «Баткившчина» (5,4%), Олег Тягнибокнинг «Озодлик» (6,3%) партиялари, Мухолифат блоки (7,6%) ҳамда Радикал партия (6,4%) ҳам парламентга ўтади.

Олий радага Украина Коммунистик партияси, «Ўнг сектор» ва «Кучли Украина» кирмайди.

Украина Марказий сайлов комиссиясининг маҳаллий вақт билан 16:00 ҳолатига кўра хабар беришича, сайловда овоз берувчиларнинг 40,77 фоизи қатнашган.

Сайловларда 29 та партия иштирок этди. Қрим, Севастополь ҳамда Донецк ва Луганск вилоятларидаги баъзи округларда сайлов ўтказилмагани сабабли Украина парламентидаги 30 та ўрин бўш бўлиб қолади.