Хитой Ўзбекистонда кимё мажмуаси қурилишига 300 млн доллар ажратади

Хитойнинг Эксимбанки 2014 йил охиригача Ўзбекистон ҳукуматига «Навоийазот» АЖ базасида поливинилхлорид (ПВХ) чиқариш бўйича кимёвий мажмуа қуриш учун 300 миллион доллар миқдорида кредит тақдим этади. Бу ҳақда корхона вакилига таяниб «РИА Новости» хабар берди.

Маълум бўлишича, кредит шартлари келишиб олинган, маблағ ноябрь—декабрь ойларида ажратилиши мумкин.

Эслатиб ўтамиз, августда Хитойнинг China CAMC Engineering Cо Ltd компанияси «Навоийазот» АЖ базасида поливинилхлорид ишлаб чиқариш бўйича 439,8 миллион долларлик кимё мажмуасини қуриши хабар берилган эди.

Хитой компанияси келишув доирасида ишлаб чиқариш қуввати йилига 100 минг тонна ПВХ, 75 минг тонна каустик сода ва 300 минг тонна метанолга тенг мажмуани тайёр ҳолда топширади. Лойиҳани амалга ошириш муддати 36 ой.

Умумий қиймати 501,1 миллион долларга тенг лойиҳа чет эл кредитлари ва ўзбек томони маблағлари томонидан молиялаштирилади.

«Навоийазот» Ўзбекистондаги энг йирик кимёвий корхона бўлиб, 1964 йилда ишга туширилган. Завод азот ўғитлар, нитрон тола ва бошқалар ишлаб чиқаришга ихисослашган.