Ўзбекистонда янги очилган алоқа операторига «МТС»нинг Олтой ўлкасидаги филиали раҳбари директор этиб тайинланди

Ўзбекистонда очиладиган Universal Mobile Systems МЧЖ қўшма корхонаси директори этиб Дмитрий Нагорний тайинланди. У бундан аввал «МТС» компаниясининг Россиянинг Олтой ўлкасидаги филиалига раҳбарлик қилган.

Kapitalist.tv нашрининг хабар беришича, Дмитрий Нагорний «МТС»нинг Олтой филиалида 2013 йил 5 августдан ишлаб келган, орадан роппа-роса бир йил ўтиб, лавозимдан озод этилган.

Бунгача тўққиз йил давомида «МТС»нинг Сибирдаги филиалида ҳуқуқшунослик бўлими директори бўлган.

Нагорний 1972 йилда туғилган. Томск давлат университетини «Юриспруденция» мутахассислиги бўйича тамомлаган. У «МТС»даги карьерасини 1998 йилда компаниянинг Новосибирск областидаги филиалида етакчи ҳуқуқий маслаҳатчи сифатида бошлаган.

Эслатиб ўтамиз, Россиянинг «МТС» мобил алоқа оператори Ўзбекистонда мамлакат ҳукумати билан тузилган Universal Mobile Systems қўшма корхонаси доирасида 1 декабрда алоқа тармоғини ишга туширади.

Сентябрь охирида қўшма корхонага 2G/3G/LTE лицензиялар, зарур частота диапазони, рақам сиғими ва иш учун зарур бўлган бошқа рухсатномалар берилгани хабар берилган эди.

24 сентябрдан Ўзбекистоннинг кўпгина ҳудудларида мобил алоқа фойдаланувчилари телефонларида «МТС» тармоғи кўрина бошлагани ҳақида хабарлар пайдо бўлди. Тармоқ қурилмаларда «UZB MTS» номи билан пайдо бўлди. Аммо тармоққа уланганда қурилмада «No service» («Алоқа йўқ») деган ёзув пайдо бўлмоқда ва қўнғироқларни амалга оширишнинг имконияти йўқ. Бу борада компания тармоқни синовдан ўтказаётгани ҳақида тахмин қилиш мумкин.

Аввалроқ, «МТС» компанияси Ўзбекистон ҳукумати билан муроса битими имзолагани, Ўзбекистонда янги қўшма корхона ташкил этиши, корхонанинг 50,01 фоизи «МТС»га, 49,99 фоизи эса Ўзбекистон ҳукуматига тегишли бўлиши ҳақида хабар берган эди.

Бундан ташқари, Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси UMS’га илк фаолиятини олиб бориши учун 2,5 миллион абонент рақами ажратгани, улардан 1,5 миллиони Тошкент аҳолиси учун берилган бўлиб, қолган рақамлар Ўзбекистон вилоятлари бўйича тақсимланганлиги 18 сентябрь куни эълон қилинган эди.