Ўзбекистонда рўйхатга олинган тўрт сиёсий партиядан учтаси 21 декабрь куни бўладиган парламент сайловларида иштирок этиш учун имзо тўплаш жараёнини якунлади ва зарур ҳужжатларни Марказий сайлов комиссиясига топширди. Бу ҳақда Марказий сайлов комиссияси (МСК) матбуот хизматига таяниб, «Кун» хабар берди.
Ҳозиргача Тадбиркорлар ва ишбилармонлар ҳаракати – Ўзбекистон либерал-демократик партияси, «Миллий тикланиш» демократик партияси ва «Адолат» социал-демократик партияси ҳужжатларни тақдим этиб бўлган. Ўзбекистон Халқ демократик партияси эса мамлакатда рўйхатга олинган тўртинчи партия ҳисобланади.
Сайловларда иштирок этиш учун ҳар бир партия сайловчиларнинг камида 40 минг имзосини тўплаши керак. Бунда Ўзбекистоннинг битта маъмурий-ҳудудий тузилмасида тўпланган имзолар сони талаб этилган имзолар сонининг 8 фоизидан ошмаслиги лозим.
Ўз навбатида, МСКда имзо варақалари тўғри тўлдирилганини текшириш бўйича ишчи гуруҳи ўз ишини бошлади. Унинг таркибида МСК аъзолари, жамоат ташкилотлари вакиллари, ички ишлар, адлия органларининг, шунингдек, аҳолини ҳисобга олиш билан шуғулланувчи муассасаларнинг мутахассислари бор. Текширувларда ҳар бир партиянинг ваколатли вакили ҳам қатнашиши мумкин.
МСК тақдим этилган ҳужжатлар асосида қонунда белгиланган муддатда партиянинг сайловда қатнашишига ижозат бериш тўғрисида узил-кесил қарор қабул қилади.
«Gazeta.uz»нинг ёзишича, партиялар томонидан депутатлар номзодини илгари суриш жараёни 17 октябрдан бошланиши керак.
Изоҳ (0)