O‘zbekistonda ro‘yxatga olingan to‘rt siyosiy partiyadan uchtasi 21-dekabr kuni bo‘ladigan parlament saylovlarida ishtirok etish uchun imzo to‘plash jarayonini yakunladi va zarur hujjatlarni Markaziy saylov komissiyasiga topshirdi. Bu haqda Markaziy saylov komissiyasi (MSK) matbuot xizmatiga tayanib, “Kun” xabar berdi.
Hozirgacha Tadbirkorlar va ishbilarmonlar harakati – O‘zbekiston liberal-demokratik partiyasi, “Milliy tiklanish” demokratik partiyasi va “Adolat” sotsial-demokratik partiyasi hujjatlarni taqdim etib bo‘lgan. O‘zbekiston Xalq demokratik partiyasi esa mamlakatda ro‘yxatga olingan to‘rtinchi partiya hisoblanadi.
Saylovlarda ishtirok etish uchun har bir partiya saylovchilarning kamida 40 ming imzosini to‘plashi kerak. Bunda O‘zbekistonning bitta ma’muriy-hududiy tuzilmasida to‘plangan imzolar soni talab etilgan imzolar sonining 8 foizidan oshmasligi lozim.
O‘z navbatida, MSKda imzo varaqalari to‘g‘ri to‘ldirilganini tekshirish bo‘yicha ishchi guruhi o‘z ishini boshladi. Uning tarkibida MSK a’zolari, jamoat tashkilotlari vakillari, ichki ishlar, adliya organlarining, shuningdek, aholini hisobga olish bilan shug‘ullanuvchi muassasalarning mutaxassislari bor. Tekshiruvlarda har bir partiyaning vakolatli vakili ham qatnashishi mumkin.
MSK taqdim etilgan hujjatlar asosida qonunda belgilangan muddatda partiyaning saylovda qatnashishiga ijozat berish to‘g‘risida uzil-kesil qaror qabul qiladi.
“Gazeta.uz”ning yozishicha, partiyalar tomonidan deputatlar nomzodini ilgari surish jarayoni 17-oktabrdan boshlanishi kerak.
Izoh (0)