«Ўзбекистон темир йўллари» давлат акциядорлик темирйўл компаниясига қарашли «Ўзтемирйўлконтейнер» акциядорлик жамияти томонидан Поп туманининг Чодак қишлоғида юк ортиш ва тушириш маскани фойдаланишга топширилди. Бу ҳақда «Халқ сўзи» газетаси хабар берди.
Иншоот янги барпо этилаётган «Ангрен — Поп» электрлаштирилган темир йўли ёнида қурилган бўлиб, «Ангрен» логистика марказидан автотранспортда келтирилган халқ хўжалик юкларини водий вилоятларига темир йўл орқали етказишга хизмат қилади. Ҳозир замонавий техника воситалари билан жиҳозланган масканда контейнер майдонлари, шунингдек, божхона ва транспорт-экспедиция хизмати ташкил этилган.
Юк ортиш ва тушириш масканининг қурилиши Қамчиқ довони орқали ўтган автомобиль йўлида тирбандликни камайтириш ҳамда катта миқдорда ёнилғи материалларини тежаш, шунингдек, Фарғона водийсида темир йўл транспорти орқали йилига 603 миллион тоннадан ортиқ юк ташиш имконини беради. Яна бир муҳим жиҳати, бугунги кунда бу ерда юзга яқин иш ўрни яратилди. Айни чоғда маскан худуди ободонлаштирилиб, ишловчилар учун зарур қулайликлар яратилди. Яқин вақт ичида бу ерда «Темирйўлобод» станцияси ҳам ишга туширилади. Бундан ташқари, юк терминали ёнида маиший мажмуалар, ошхона, дам олиш жойлари ва бошқа инфратузилма объектлари бунёд этилади.
Изоҳ (0)