Ўзбекистон Республикаси Президенти Ислом Каримов Самарқандда бўлиб ўтаётган БМТ Жаҳон сайёҳлик ташкилоти (UNWTO) Ижроия қўмитасининг 99-сессияси очилиш маросимида нутқ сўзлади. Нутқнинг тўлиқ матни ЎзА томонидан эълон қилинди.
Ислом Каримов аввало, Жаҳон сайёҳлик ташкилоти Бош котиби жаноб Талеб Рифаи ва кенгашнинг барча аъзоларига мазкур кенгашнинг навбатдаги сессияси мажлиси ўтказиладиган жой сифатида турли маданиятлар чорраҳаси ва жаҳон цивилизацияси дурдонаси бўлмиш қадимий ва ҳамиша навқирон Самарқанд шаҳрини танлагани учун самимий миннатдорлик билдирди.
«Азиз меҳмонларимизни мана шу меҳмондўст заминда кўриш ва бутун Самарқанд аҳли номидан, шахсан ўз номимдан ‘Самарқандга хуш келибсиз!’ деб айтиш менга алоҳида мамнуният бағишлайди», — деди президент.
Шундан сўнг давлат раҳбари Ўзбекистон ҳудудида туризмнинг пайдо бўлиш тарихига қисқача тўхталиб ўтди.
«Самарқанд шаҳридаги деворий расмларда Ўрта Осиёга дунёнинг турли ўлкаларидан келган элчилар, савдогар ва саёҳатчиларнинг ташрифи ўз аксини топган. Бу ноёб тарихий асарда бундан 2,5 минг йилдан зиёд аввалги даврда Афросиёб ҳукмдорининг саройида Хитой, Корея, Жанубий ва Шимолий Осиё ва бошқа давлатларнинг элчиларини қабул қилиш маросимлари тасвирланган», — деди у.
Ислом Каримов бугунги кунда дунёда шиддат билан ўзгариб бораётган вазият, глобаллашув жараёнларининг жадаллашуви, тез-тез такрорланаётган жаҳон иқтисодий ва молиявий инқирозлари халқаро туризм ривожи йўлида турли муаммолар туғдириб, унинг олдига янги-янги талаблар қўяётганини таъкидлар экан, бундай муаммоларнинг баъзиларига тўхталиб ўтди.
Эслатиб ўтамиз, 1 октябрь куни Самарқанд шаҳрида БМТ Жаҳон туризм ташкилоти (UNWTO) Ижроия қўмитасининг 99-сессияси иш бошлади. Сессияда қатнашиш учун 10 дан ортиқ халқаро ташкилотлар вакиллари, 30 давлат олимлари, мутахассислари ва туризм компаниялари раҳбарлари ташриф буюрган.
Самарқанддаги сессияни ёритиш учун 35 давлатдан 100 га яқин журналистлар, жумладан, Euronews телеканали вакиллари иш олиб бормоқда. Журналистлар учун «Orient Star Ko‘ksaroy» меҳмонхонасида матбуот маркази ташкил қилинган.
Изоҳ (0)