БМТ Жаҳон сайёҳлик ташкилоти Бош котиби: «Уйғониш даври аслида Ўзбекистон ҳудудида анча илгари бошланган»

БМТ Жаҳон сайёҳлик ташкилоти Бош котиби Талеб Рифаининг ЮНВТО Ижроия кенгаши 99-сессиясининг очилиш маросимида нутқ сўзлади, деб ёзади ЎзА.

Бош котиб ўз нутқи аввалида Ўзбекистонда сайёҳлик соҳасида эришилган ютуқларга тўхталиб ўтди.

Ушбу ҳудуддаги тарихга назар солар экан, Талеб Рифаи Европа тарихида муҳим ўрин тутган Ренессанс, яъни, Уйғониш даври аслида мана шу заминда анча илгари бошланганини таъкидлади ва замонавий маданият ҳамда цивилизация айнан шу минтақада пайдо бўлган, деб ишонч билдирди. «Шу заминда туғилиб вояга етган буюк инсонлар башарият цивилизацияси ривожига улкан ҳисса қўшган. Алгебра асосчиси Хоразмий, файласуф Форобий ёки улуғ қомусий олим Абу Райҳон Беруний, тиббиёт илмига асос солган Абу Али ибн Сино каби буюк аллома ва мутафаккирларни бутун дунё яхши билади», — деди у.

«Туризмни ривожлантириш катта масъулият талаб этади. Ўзининг тарихий ва маданий меросини асраб-авайлаб келаётган Ўзбекистонда умумбашарий бойлик ҳисобланган ноёб тарихий ёдгорликларни реставрация қилиш ва қайта тиклашга катта миқдорда маблағ йўналтирилаётгани қувонарли ҳолдир.

Айни пайтда Буюк ипак йўли машҳур брендга айланди ва бепоён Осиё минтақаси, жумладан, Ўзбекистонда туризмни янада ривожлантиришга хизмат қилмоқда». — деди Бош котиб.

У ўз нутқига якун ясар экан, форум самарали ўтишига қатъий ишонч билдирди.