АҚШ собиқ президенти кичик Жорж Буш укаси Жебнинг сиёсий режаларини тасдиқлади, дея хабар бермоқда Uzbekistan Today Fox News’га таяниб. У 2016 йилда бўлиб ўтадиган президентлик сайловларида эҳтимолий номзодлардан ҳисобланади.
«Ўйлашимча, у президент бўлиш истагида», — деди кичик Буш телеканалга берган интервьюсида. Шу билан бирга, собиқ президентнинг таъкидлашича, Жеб Буш ушбу масала бўйича якуний қарорга келганича йўқ.
«У жуда эҳтиёткор одам, у ўз имкониятларини чамалаб кўради», — дея қўшимча қилди Жорж Буш.
Жеб Буш 1953 йилда Техасда туғилган. 1980—1990 йилларда у Флорида штатида сиёсий карьерасини олиб борган. 1999 йилда штат губернаторига айланиб, 2007 йилгача ушбу лавозимда қолган.
Кичик Жорж Буш ўз укасини кўп марта 2016 йилги сайловларда қатнашишга даъват этган.