«Алоқабанк» «МТС» ўрнига очиладиган UMS алоқа операторига 500 млрд сўмлик кредит тақдим этди

«Алоқабанк» акциядорлик тижорат банки «МТС» ўрнига очиладиган янги UMS (Universal Mobile Systems) мобил операторига 500 миллиард сўм (тахминан 211,553 миллион доллар) кредит тақдим этди. Бу ҳақда UzDaily хабар берди.

Банк маълумотларига кўра, АТ «Алоқабанк» акциядорлари Universal Mobile Systems МЧЖга шу миқдордаги кредит бериш тўғрисидаги ҳужжатни имзолаган.

Эслатиб ўтамиз, «МТС» компанияси Ўзбекистон ҳукумати билан муроса битими имзолагани, Ўзбекистонда янги қўшма корхона — Universal Mobile Systems ташкил этиши, корхонанинг 50,01 фоизи «МТС»га, 49,99 фоизи эса Ўзбекистон ҳукуматига тегишли бўлиши ҳақида хабар берилган эди.

UMS’ни рўйхатга олиш ишлари 25 сентябрга қадар тугалланиши кутилаётгани маълум қилинган эди. Бундан ташқари, қўшма корхонанинг 1 ноябрга қадар техник, 1 декабргача эса тижорий эксплуатацияни амалга ошириши режалаштирилган.

Янги компания ҳақидаги сўнгги маълумотлар унга 2,5 миллионта телефон рақами ажратилгани ва ушбу рақамлар рўйхатидан иборат бўлди.