Урганчда янги троллейбус йўналишлари очилади

Бугунги кунда Хоразм вилоятида республикада ягона бўлган троллейбус йўналиши фаолият олиб боради. У Урганч ва Хива оралиғида қатнайди. «Хоразм троллейбус бошқармаси» корхонаси мутахассислари айни пайтда янги троллейбус йўналиши устида иш олиб бормоқда. У Урганч бўйлаб ҳалқа йўлида ҳаракатланади. Бу ҳақда Uzbekistan Today хабар берди.

«Дастлаб янги йўналишда эски троллейбуслардан фойдаланамиз, уларни кейинчалик янгилари билан алмаштирамиз», — дея аниқлик киритди «Хоразм троллейбус бошқармаси» директори Руслан Рўзметов.

Кейинчалик яна иккита йўналишни ишга тушириш режалаштирилган. Улардан бири шаҳардаги марказий кўчалардан бири орқали ўтади. Иккинчиси шаҳардаги энг йирик икки бозорни бирлаштиради.

Рўзметовнинг айтишича, бу йил корхона зарарига ишлашдан тўхтаган. «Харажатлар ва реал тушумлар ўртасидаги деярли 30 фоизга тенг фарқни мавжуд моддий-техник базадан самарали фойдаланиш орқали қопламоқдамиз, — деди у. — Толлейбус паркида катта автобус ва автомобилларни ювиш хизмати йўлга қўйилди. Бу нафақат троллейбус ҳаракатини ташкил этиш харажатларини қоплайди, балки уни ривожлантириш учун режаларни амалга оширишга ҳам имкон беради».