Ҳозирда янги туғилган чақалоқларга машҳур футболчилар исмини бериш урфга кирди. Энг қизиғи, баъзан болаларга футболчиларнинг фамилиялари исм сифатида берилади, деб қайд этди Championat.com.
Хусусан, бундан бир неча кун аввал фарзандли бўлган Аргентина терма жамоаси ишқибозларидан бири Эктор Варела ўғлига Лионель эмас, Месси деб исм берди. Варела Мессининг мухлиси эканлигини айтиб, бошқа бундай футболчини кўрмаганлиги ва кўрмаслигини қайд этди. «Кўпчилик ўзининг ўғлига Лионель деб исм бермоқда, бироқ мен учун Месси варианти яхшироқ. Аёлим бундай исм беришни мўлжаллаётганимни билгач, қаршилик қилмади. У Мессининг инсонийлик хислатларини қадрлайди. У бу қарорнинг тўғрилигига шубҳа қилмади», — деди Варела.
Фарзандларини футболчилар фамилияси билан аташ ҳолатлари Исроилда ҳам кузатилмоқда. Жумладан, мазкур мамлакат термасида тўп сурадиган Берам Каял ўзининг фарзандига Италия терма жамоаси футболчиси шарафига Пирло деб исм берди.
Италия терма жамоаси ва «Парма» клуби ўйинчиси Антонио Кассано ҳам Мессининг мухлисларидан бири эканлигини ўғлига Лионель деб исм бериш орқали намоён қилди. «Ўғлимни Лионель деб атадим. Бироқ аёлим бундан хурсанд бўлмади. Мен Мессини футбол тарихидаги муҳим ўйинчи деб ҳисоблайман», — деди Кассано. Кассанонинг мазкур ишидан хабар топган Месси омма олдида италиялик ҳужумчига миннатдорчилик билдирди.
Херард Пике ва Шакиранинг ўтган йил январь ойида дунёга келган биринчи фарзандига Милан деб исм берилган эди. Бундан хабар топган «Милан»чилар: «Пике ва Шакира, табриклаймиз! Янги туғилган чақалоқ учун бундан-да яхши исм топа олмасдингиз!» — деб айтди.
Белоруссияда истиқомат қилувчи Раван Разгулиев оиласида жорий йил бошида туғилган чақалоққа эса Бразилия терма жамоасининг собиқ ҳужумчиси шарафига Роналдо деб исм берилган. Шу тарзда чақалоқ Роналдо Разгулиев деган исм-шарифга эга бўлди.
Россиялик биатлончи Сергей Чепиков эса фарзандини Германия терма жамоаси ўйинчиси Мирослав Клозе шарафига Мирослав деб атади. «Ўғлим ўзининг адашидан барча яхши хислатларни олиб, келажакда унингдек машҳур спортчи бўлади, деб умид қиламиз», — деди Чепиков.
Бундан тўрт йил аввал Италиянинг «Ювентус» клуби ярим ҳимоячиси Фелипе Мело ўғлига Линекер деб исм берган эди. Қисқа муддат ичида Британия ОАВларида «Мело фарзандини Гари Линекер шарафига номлади» деган сарлавҳа билан хабар тарқалган. Бироқ футболчи бу маълумотни рад этган. «Мен бу ғояни укамга шундай исм беришни истаган отамдан ўғирлаганман. Мен отамга ‘Ота, бошқа исм топинг, мен биринчи ўғлимни Линекер деб атамоқчиман’, — деганимда кичик болакай эдим», — деди Мело.
Эслатиб ўтамиз, янги туғилган чақалоқларга машҳур футболчилар исмини бериш Ўзбекистонда ҳам кузатилмоқда. Хусусан, Хоразм вилояти Янгиариқ туманида 2014 йил июль ойида туғилган чақалоққа Роналдо деб исм қўйилгани ҳақида хабар берган эдик.
Бундан аввал ўзбекистонлик болаларга Марадона, Брюс Ли, Эсмералда, Жумонг (ўзбекча Жуман) каби исмларни қўйиш ҳолатлари қайд этилган.
Изоҳ (0)