Нидерландия Хавфсизлик кенгашининг дастлабки маърузасига кўра, Малайзия «Боинг»ининг Украина ҳудудида ҳалокатга учрашига «ташқи таъсир натижасида юзага келган тузилмавий емирилиш» сабаб бўлган. Бу ҳақда Kommersant.ru хабар бермоқда.
Тақиқот якунларига кўра, Тошкент вақти билан 18:20 гача парвоз одатий режимда ўтган. Учувчиларнинг суҳбатлари ҳеч қандай техник носозлик юзага келмаганидан дарак беради. Ҳужжатда таъкидланишича, «самолёт синиқларининг сочилиб кетиш хусусияти унинг ҳавода парчаланганини кўрсатади».
«Боинг» ҳалокати ҳақидаги маъруза тадқиқотда қатнашаётган мамлакатлар, жумладан Украина ва Россияга ҳам юборилди. Ҳужжатнинг якуний талқини ҳалокатдан кейинги бир йил ичида эълон қилинади. Мамлакат ҳукумати ҳалокатнинг якуний сабабларини аниқлаш учун қўшимча тадқиқотлар олиб борилиши кераклигини таъкидлади.
Эслатиб ўтамиз, 17 июль куни Malaysia Airlines’нинг Амстердамдан Куала-Лумпурга учиб кетаётган «Боинг-777» лайнери Украинанинг Донецк вилоятида қулаган эди. Самолёт бортида бўлган 298 киши, жумладан 85 бола ва 15 нафар экипаж аъзоларининг барчаси ҳалок бўлган.
Изоҳ (0)