Тибетнинг диний ва сиёсий етакчиси далай-лама Россия президенти Владимир Путиннинг бошқарув усулларини танқид қилди. У Россия раҳбарини янги Берлин девори қуришга уринишда айблади. Бу ҳақда Korrespondent.net хабар берди.
Далай-лама фикрича, россиялик сиёсатчи ўз мамлакати тепасида жуда узоқ вақтдан буён ҳукмронлик қилмоқда. «Жаноб Путин аввал президент бўлди, сўнг бош вазир бўлди ва яна президент бўлди. Бу сал кўпроқ эмасмикин?» — деди далай-лама Германиянинг Die Welt газетасига берган интервьюсида.
«Бу шуни кўрсатадики, у ‘мен, мен, мен’ деган ўтакетган худбинликка эга», — деди буддойилар етакчиси, Россия билан боғлиқ муаммоларнинг асоси шундан иборат эканлигига ишора қилар экан.
Далай-лама шунингдек, Хитойдан фарқли равишда Россия ва унинг президенти айни пайтда глобал сиёсий тизимнинг бир қисми бўлмоқчимаслиги ва узоқ вақт давомида ўйиннинг халқаро қоидаларини қабул қилмоқчимаслигини айтди. У Путин «эҳтимол янги Берлин деворини қуришга интилаётгани, бироқ бунда ўз мамлакатига зарар етказаётгани»ни таъкидлади. Далай-лама фикрича, Россия учун изоляция ўз жонига қасд қилиш билан тенгдир.
Изоҳ (0)