Microsoft-Nokia компаниясининг ишчи номи Lumia Superman бўлган ва «селфи телефони» деб аталган смартфони IFA-2014 кўргазмаси давомида тақдим этилди. Бу ҳақда Phonearena.com сайти маълумотига асосланиб «Пароль» нашри хабар берди.
«Селфи телефони» икки хил моделда ишлаб чиқарилади. Улардан бири 4G LTE тармоғида ишлайдиган Lumia 735 бўлса, бошқаси икки SIM-картали, 3G тармоғида ишлайдиган Lumia 730 бўлади.
Смартфон асосан селфи суратлар олиш учун мўлжалланган. Шу боис, унинг 5 мегапикселли олд камераси кенгроқ – 22 миллиметрли линзага эга. Бу, ушбу камерада олинган суратга кўпроқ киши сиғади, дегани :)
Тақдимотчиларнинг сўзларига кўра, қуйидаги Оскар мукофотида олинган ва машҳур бўлиб кетган селфи сурати «Селфи телефони» билан олинганда, сурат анча сифатли бўлар эди.
Ушбу смартфонда селфи суратлар олиш учун мўлжалланган махсус дастур ўрнатилган бўлади. Унинг ёрдами суратларни таҳрирлаш, яхшироқ ҳолатга келтириш ва ҳатто тишларни ҳам оқартириш мумкин :)
Смартфон 4,7 дюйм 720×1280 пикселли HD ClearBlack OLED дисплей, 1,2 ГГц частотага эга Snapdragon 400 ва Adreno 305 графика процессорлари, 1 Гб тезкор ва 8 Гб ички хотира (+MicroSD), 5 мегапикселли олд ва 6,7 мегапикселли орқа камерага эга. У Windows Phone 8.1 операцион тизимида ишлайди.
Смартфоннинг икки SIM-картали Lumia 730 модели 199 евро, Lumia 735 модели эса 219 евродан сотилади.
Шунингдек, Microsoft-Nokia компанияси 4 сентябрь куни юқори хусусиятларга эга Lumia 830 смартфонини ҳам тақдим этган. «Селфи телефони» ҳамда Lumia 830 смартфонларида олинган илк суратларни «Пароль» нашрининг ушбу фотожамланмасида томоша қилишингиз мумкин.
Изоҳ (0)