Қарши шаҳрида жойлашган Open Web МЧЖ раҳбари Руслан Рустамов daxshat.uz ва payclick.uz сайтлари орқали Давлат тест маркази тест натижаларини эълон қилгани ҳақида ёлғон маълумот берувчи вирус тарқалаётгани ҳақида хабар берди.
daxshat.uz ва payclick.uz сайтларига «ДТМ 2014-ўқув йили учун ўтиш балларини эълон қилди» деб ёзилган реклама баннерлари жойлаштирилди. Ушбу баннерни босишдан сўнг фойдаланувчи компьютерига архивланган файл кўчириб олинади. У файл эса, ўз навбатида, компьютер браузерида мавжуд бўлмаган http://payclick.uz/downloads/DTM-2014.r саҳифасини очишга ҳаракат қилади.
Эътиборли томони, реклама баннерларида имло хатоларига йўл қўйилмаган.
«Дарё» мутахассислари хато киритилган URLни давом эттириб, файлни юклаб олишга муваффақ бўлишди. Файл ичида DTM.uz сайтида жойланган 2013 йил натижалари скриншотлари, 2013 йил контракт нархлари — жами тўртта файл борлиги аниқланди.
Бундан ташқари, юклаб олинган файл mail.ru серверларига мурожаат қилади. Вирусни юклаб олган Facebook фойдаланувчиси сўзларига кўра, mail.ru серверлари орқали «Амиго» браузери фойдаланувчи билмаган ҳолда автоматик тарзда юклаб олинади.
Жойлаштирилган реклама баннери ва тест натижалари эълон қилингани ҳақида ДТМ расмий маълумот бермаган.
«Дарё» ходимлари огоҳлантиради: тест натижалари фақат ва фақат ДТМ расмий сайти — dtm.uz'да эълон қилинади. Бошқа сайтларда тест натижалари эълон қилинмайди.
Тест натижалари эълон қилиниш санаси ҳақида оммавий ахборот воситалари, жумладан, «Дарё» саҳифаларида хабар берилади.
Қўшимча (17:24). Хабар жойланганидан сўнг «Дарё» таҳририятига payclick.uz сайти администратори Александр (фамилиясини айтишдан бош тортди) қўнғироқ қилди. Унинг таъкидлашича, сайт вирус ва ёлғон хабар тарқатмаяпти. Биз Александрга бу борада ёзма раддия беришни таклиф қилдик, аммо ҳозиргача ундан ҳеч қандай хабар олмадик.
Александрдан қўшимча маълумот, тушунтириш ёки раддия олишимиз билан уни «Дарё» саҳифаларига жойлаймиз.
Ушбу хабардан сўнг daxshat.uz ва payclick.uz сайтларидан нохолис ахборот тарқатаётган баннер олиб ташланди.
Изоҳ (0)