3 сентябрь куни Берлинда ўтказилган IFA-2014 кўргазмасида янги Samsung Galaxy Note 4 планшетофони расман тақдим этилди. Бу ҳақда The Verge маълумотига асосланиб «Пароль» нашри хабар берди.
Samsung Galaxy Note 4 планшетофони ҳам жорий йилнинг август ойида тақдим этилган Galaxy Alpha смартфони каби метал корпусга эга. Шунингдек, у аввалги Note гаджетларидан ингичкароқ ва унинг пушти рангли тури ҳам сотувга чиқарилади.
Янги Galaxy Note 4 худди Galaxy Note 3 каби 5,7 дюйм, 2560×1440 пикселли AMOLED дисплейга эга. Бироқ, унда Note 3’даги каби Full HD эмас Quad HD дисплей ўрнатилган.
Galaxy Note 4’нинг тўрт ядроли ва саккиз ядроли процессорга эга турлари бор. Унда 3 Гб тезкор ва MicroSD ёрдамида кенгайтириш мумкин бўлган 32 Гб ички хотира мавжуд. У Android KitKat 4.4.4 операцион тизимида ишлайди. Планшетофон худди Galaxy S5 каби юрак уришини назорат қилувчи дастур ва бармоқ сенсорига эга. Ушбу гаджетнинг қора, оқ, пушти ва бронза рангли турлари сотувга чиқарилади.
Планшетофонда 3,7 мегапикселли олд ва 16 мегапикселли орқа камералар ўрнатилган. Унинг олд камераси 120 градусли бурчак остида сурат олади. Шу боис унинг ёрдамида селфи сурат олиш анча қулай. Шунингдек, олд камерада ҳам панорама сурат олиш мумкин. Буни тақдимотда Samsung ходимлари кўрсатиб беришди ва ушбу функциялар ростдан ҳам ажойиб!
Планшетофон батареясининг қуввати 3220 мА·соатни ташкил этади. Бу кўрсаткич Note 3 батареяси билан деярли бир хил. Аммо янги гаджетда тезкор қувватлаш функцияси мавжуд. Бу билан у планшет батареяси қувватини 50 фоизга тўлдириш учун 30 дақиқа вақт сарфлайди. Galaxy Note 3 эса бу иш учун 55 дақиқа сарф этар эди.
Galaxy Note 4’да овозни ёзиб олиш учун махсус функция бўлиб, унинг ёрдамида шовқин жойларда ёзилган аудиолардан айнан керакли овозларини танлаб олиш ва тинглаш мумкин. S Pen гаджети эса планшетофоннинг орқа томонидан жой олган. Samsung компанияси Galaxy Note 4 учун жуда кўплаб бепул дастурлар тўпламини тайёрламоқда.
Ҳозирча янги Samsung Galaxy Note 4’нинг нархи қанча бўлиши ва қачондан сотила бошланиши ҳақида маълумот йўқ.
Samsung Galaxy Note 4 планшетофонининг илк ва расман тасдиқланган суратларини ушбу манбада томоша қилинг. Шунингдек, Samsung компанияси 3 сентябрь куни Gear VR — виртуал ҳаётни кўриш кўзойнаги ва Gear S ақлли соатини ҳам тақдим этди.
Изоҳ (0)