3-sentabr kuni Berlinda o‘tkazilgan IFA-2014 ko‘rgazmasida yangi Samsung Galaxy Note 4 planshetofoni rasman taqdim etildi. Bu haqda The Verge ma’lumotiga asoslanib “Parol” nashri xabar berdi.
Samsung Galaxy Note 4 planshetofoni ham joriy yilning avgust oyida taqdim etilgan Galaxy Alpha smartfoni kabi metal korpusga ega. Shuningdek, u avvalgi Note gadjetlaridan ingichkaroq va uning pushti rangli turi ham sotuvga chiqariladi.
Yangi Galaxy Note 4 xuddi Galaxy Note 3 kabi 5,7 dyuym, 2560×1440 pikselli AMOLED displeyga ega. Biroq, unda Note 3’dagi kabi Full HD emas Quad HD displey o‘rnatilgan.
Galaxy Note 4’ning to‘rt yadroli va sakkiz yadroli protsessorga ega turlari bor. Unda 3 Gb tezkor va MicroSD yordamida kengaytirish mumkin bo‘lgan 32 Gb ichki xotira mavjud. U Android KitKat 4.4.4 operatsion tizimida ishlaydi. Planshetofon xuddi Galaxy S5 kabi yurak urishini nazorat qiluvchi dastur va barmoq sensoriga ega. Ushbu gadjetning qora, oq, pushti va bronza rangli turlari sotuvga chiqariladi.
Planshetofonda 3,7 megapikselli old va 16 megapikselli orqa kameralar o‘rnatilgan. Uning old kamerasi 120 gradusli burchak ostida surat oladi. Shu bois uning yordamida selfi surat olish ancha qulay. Shuningdek, old kamerada ham panorama surat olish mumkin. Buni taqdimotda Samsung xodimlari ko‘rsatib berishdi va ushbu funksiyalar rostdan ham ajoyib!
Planshetofon batareyasining quvvati 3220 mA·soatni tashkil etadi. Bu ko‘rsatkich Note 3 batareyasi bilan deyarli bir xil. Ammo yangi gadjetda tezkor quvvatlash funksiyasi mavjud. Bu bilan u planshet batareyasi quvvatini 50 foizga to‘ldirish uchun 30 daqiqa vaqt sarflaydi. Galaxy Note 3 esa bu ish uchun 55 daqiqa sarf etar edi.
Galaxy Note 4’da ovozni yozib olish uchun maxsus funksiya bo‘lib, uning yordamida shovqin joylarda yozilgan audiolardan aynan kerakli ovozlarini tanlab olish va tinglash mumkin. S Pen gadjeti esa planshetofonning orqa tomonidan joy olgan. Samsung kompaniyasi Galaxy Note 4 uchun juda ko‘plab bepul dasturlar to‘plamini tayyorlamoqda.
Hozircha yangi Samsung Galaxy Note 4’ning narxi qancha bo‘lishi va qachondan sotila boshlanishi haqida ma’lumot yo‘q.
Samsung Galaxy Note 4 planshetofonining ilk va rasman tasdiqlangan suratlarini ushbu manbada tomosha qiling. Shuningdek, Samsung kompaniyasi 3-sentabr kuni Gear VR — virtual hayotni ko‘rish ko‘zoynagi va Gear S aqlli soatini ham taqdim etdi.
Izoh (0)