Мишель Обама зомбилар ҳақидаги ҳажвий видеолавҳада суратга тушди

АҚШнинг биринчи хоними Мишель Обама Funny or Die ҳазил лойиҳаси сайтига жойлаштирилган видеода рол ўйнади, дея хабар бермоқда Gazeta.ru.

Роликда Америка мактабларидан бирида зарарли озиқ-овқат сотиш оқибатлари ҳажвий тарзда кўрсатиб берилган. Унда носоғлом овқатланиш натижасида мактаб ўқувчилари зомбиларга айланиб қолади.

Мишель Обама видеолавҳа сўнгида пайдо бўлади. У икки дугонаси билан видео томоша қилиб сабзи еяётган бўлади. «Сиз ҳам фильмнинг бутун сюжети очиб берилган трейлерларни ёқтирмайсизми? — деб сўрайди биринчи хоним. — Келинглар, яхшиси яна «Муз юрак» мултфильмини кўрамиз».

Ушбу роликда Мишель Обаманинг иштироки беҳудага эмас — у америкалик ёшлар орасида соғлом овқатланишни фаол равишда тарғиб қилади.

Нашрнинг эслатишича, 2014 йил мартида Барак Обама ҳам Funny or Die лойиҳасидаги ҳазиломуз видеолардан бирида суратга тушган.