Ҳарбий доктринасининг янги версиясида Россия ўзининг асосий душманини аниқлаштириб олиши, шунингдек Россия ядровий бетарафлик кучлари томонидан огоҳлантирувчи зарба берилиши учун шартларни аниқ белгилаб олиши керак. Бу ҳақда Россия мудофаа вазирлигининг бош инспекторлар бошқармаси координатори армия генерали Юрий Якубовга таяниб, Interfax хабар берди.
«Мамлакат учун стратегик аҳамиятга эга бўлган ушбу ҳужжатда Россиянинг эҳтимолий душмани аниқ қилиб ифодаланиши керак, бу 2010 йилги ҳарбий доктринага киритилмаган. Менинг фикримча, бизнинг асосий рақибларимиз АҚШ ва Шимолий Атлантика блокидир», — деди генерал.
Унинг эслатишича, бир неча йиллар аввал АҚШ ва НАТО раҳбарияти Шимолий Атлантика блоки ва Ғарб Россиянинг душмани эмаслигини таъкидлаган. Бироқ айни пайтда, генерал фикрича, Россияга қарши «ҳақиқий ахборот уруши олиб борилиб, у атайлаб Ғарб душмани сифатида кўрсатилмоқда».
«Асосийси эса — бизнинг чегараларимизга АҚШ ва НАТО базалари яқинлашиб келмоқда. Бундай глобал ўзгаришлар ҳарбий доктринага киритилиши керак, деб ўйлайман», — деди Якубов.
Нашрнинг эслатишича, яқинда Россия Украинадаги воқеалар, НАТОнинг шарқда янги базалар очиши, АҚШнинг Европага ракетага қарши мудофаа жойлаштириш режалари туфайли йил охиригача ҳарбий доктринага аниқлик киритиши маълум бўлган эди.
Генерал сўзларига кўра, янги ҳужжатда Ҳарбий коинот мудофааси қўшинлари тузилгани, Ҳарбий десант қўшинлари асосида Тез жавоб қилиш кучлари шакллантирилгани, шунингдек Давлат мудофаасини бошқариш миллий маркази яратилгани ва бошқалар акс этиши лозим.
Россия ҳарбий доктринасининг амалдаги версияси 2010 йил 5 февралда қабул қилинган. Унда Россия Федерацияси унга ёки унинг иттифоқдошларига қарши ядро ва бошқа оммавий қирғин қуроллари қўлланилса, ёки оддий қурол қўллаган ҳолда йирик кўламдаги тажовуз амалга оширилса, ва бунда Россия давлати хавф остига қўйилса, ядро қуроли қўллаш ҳуқуқини ўзида сақлаб қолиши кўзда тутилган.
Изоҳ (0)