Грузия бош прокуратураси мамлакат собиқ президенти Михаил Саакашвилига нисбатан халқаро қидирув эълон қилиш процедурасини бошлади, дея хабар берди ИТАР-ТАСС мамлакат бош прокуратурасининг матбуот котиби Натия Сухиашвилига таяниб.
Натия Сухиашвили собиқ президентга ички давлат қидируви эълон қилиниши билан параллел равишда Бош прокуратуранинг тегишли ҳуқуқий сўрови асосида унга халқаро қидирув эълон қилиб, Интерполнинг Қизил циркулярига киритиш процедураси бошланганини айтди.
Нашрнинг аниқлик киритишича, Қизил циркуляр рўйхатидаги шахслар юқори хавф туғдирувчи ҳисобланиб, дунёнинг ҳар бир мамлакатида ҳуқуқ-тартибот кучлари томонидан ҳибсга олинади ва Интерполга тегишли сўров юборган давлатга топширилади.
Эслатиб ўтамиз, 14 августда Грузия собиқ президенти Михаил Саакашвилига нисбатан расман давлат ичидаги қидирув эълон қилинган эди.
Грузия прокуратураси собиқ президентни давлатга тегишли 5 миллион доллар маблағни ноқонуний равишда сарфлаб юборганликда айбланмоқда. Бундан ташқари, у 2007 йил 7 ноябрь куни Тбилисида намойишга чиққан мухолифатни куч билан бостирганликда ва Грузия парламенти собиқ депутати Валерий Гелашвилини дўппослаганликда айбланмоқда.
Изоҳ (0)