1 сентябрь, душанба куни Тошкентдаги кўп қаватли уйлардан бирида лифтдаги носозлик туфайли 12 ёшли бола вафот этди. Бу ҳақда Facebook’даги Потребитель.Уз гуруҳи аъзолари хабар бермоқда.
Гуруҳга марҳум болакайнинг қариндоши пост ёзган. Унга кўра, болакай биринчи қаватга тушган ва иккита эшигидан биттаси очилган лифтга чиққан. У лифт ичига тўлиқ кириб улгурмасдан, лифт тепага юриб кетган.
«У ажойиб бола эди. Аҳмоқона ва бема’ни сабабларга кўра вафот этгани қанчалик ачинарли ва аянчли! Бугун у мактабга бориши керак эди...», — дея қайд этди фойдаланувчи.
Гуруҳ аъзоси ўз қайғусини бўлишиш билан биргаликда, носоз лифтлардан фойдаланмаслик, уй-жой ширкатлари, лифтчилар ва бошқа масъуллардан лифтларни тузатишни доимий равишда талаб қилишга даъват этди.
«Лифт мураккаб механизмдир. Унга нисбатан кўрилган ярим-ёрти чоралар бахтсиз ҳодисаларга олиб келади!» — деб ёзди фойдаланувчи.
Постга билдирилган фикрларда гуруҳ аъзолари муаллифга ва болакайнинг ота-онасига ҳамдардлик изҳор этган. Шу билан биргаликда уларнинг кўпчилиги фожиа учун жавобгарликни уй-жой ширкати ўз бўйнига олиши кераклигини таъкидлаган. «Улар ўз вақтида носозликни бартараф этиш учун усталарни чақириши керак эди», — деб ёзади улардан бири.
Баъзилар эса бу учун ҳеч ким жавобгарликка тортилмаслигини, энди бунинг аҳамиятсиз ҳам эканлигини қайд этган.
Яна бир фойдаланувчи эса гуруҳ аъзолари билан бирлашиб, боланинг ўлимига сабабчи бўлганларни жазога тортиш ташаббусини илгари сурди. «Ота-онасининг кўнглига ҳозир бу нарса сиғмайди, лекин, келинглар, биз бунга ёрдам берамиз», — деб ёзади у.
Изоҳлардан бирида эса марҳумнинг қариндошига туман прокуратурасига ариза билан мурожаат қилишни маслаҳат беришган.
Ушбу ҳодиса юзасидан расмий маълумот берилмаган.
Изоҳ (0)