НATO Шарқий Европага бешта база жойлаштирмоқчи. ИТАР-ТАССнинг Frankfurter Allgemeine Sonntagszeitung газетасига таяниб хабар беришича, улар Латвия, Литва, Эстония, Руминия ва Польша ҳудудларида пайдо бўлади.
Шимолий Атлантика альянси режалари бўйича, базаларнинг ҳар бирига узоқ муддатли асосда 600 нафаргача ҳарбий хизматчи кўчириб ўтказилади. Нашр бошқа муҳим тафсилотларни келтирмайди, ушбу режалар 4—5 сентябрь кунлари Уэлсда бўлиб ўтадиган саммитда батафсил муҳокама этилади.
Аввалроқ НATO бош котиби Андерс Фог Расмуссен ушбу газетага берган интервьюсида Альянс Шарқий Европадаги иштирокининг «янада кўринарлироқ» бўлишига эришиши мақсадга мувофиқ бўлишини айтган эди. Унинг сўзларига кўра, Уэлсда тезкорлик билан жавоб қилиш кучлари самарадорлигини ошириш ҳақида қарор қабул қилинади, бу НATOга янги пайдо бўлаётган хавфларга тезкорлик билан жавоб қилиш имконини беради.
Расмуссен ушбу кучларни «найза учи» деб атади ва бу ниятларни амалга ошириш учун блокка аъзо мамлакатларда зарур инфратузилмани шакллантириш керак бўлишини айтди.
«Бизнинг Шарқдаги иттифоқдошларимиз бу режадан қониқади, деб ўйлайман», — деди у.
«Шимолий Атлантика альянсининг ҳар бир аъзосини самарали мудофаа қилиш учун зарур бўлган барча чораларни кўрамиз», — таъкидлади бош котиб.
Изоҳ (0)