НATO бош котиби Андерс Фог Расмуссен Украина ўз ҳарбий-сиёсий статуси бўйича қарор қабул қилишга ҳақли эканини айтди. Бу ҳақда «Сегодня» хабар бермоқда.
«Биз хавфсизлик сиёсати ва иттифоқдошлар танлови бўйича Украина қарорларини тўлиқ ҳурмат қиламиз», — деди у Украина ҳукуматининг парламентга Евроатлантик интеграцияда давом этиш тўғрисидаги қонун лойиҳасини тақдим этиш ҳақидаги қарорини изоҳлар экан.
«Мен Украинадаги сиёсий баҳсларга аралашмоқчи эмасман, бироқ шуни эслатиб қўйишим жоизки, 2008 йилда Бухарестда бўлган саммит қарорига кўра, Украина ўзи истаса ва мезонларга жавоб берса, НATO аъзосига айланади», — дея қўшимча қилди Альянс бош котиби.
Расмуссен айни пайтда Украина қонунчилиги НATOга аъзо бўлишни мўлжалламаётганлигини эслатди. «Биз буни ҳурмат қиламиз. Биз Украина парламентининг буни ўзгартириш ҳақидаги қарорини ҳам тўлиқ ҳурмат қиламиз», — таъкидлади у.
Нашрнинг эслатишича, бош вазир Арсений Яценюк Украна Вазирлар Маҳкамаси парламентга мамлакатнинг «блокдан ташқари» статусини бекор қилиш ҳақидаги қонун лойиҳасини кўриб чиқиш учун тақдим этишини айтган эди.
Изоҳ (0)