Россия Либерал-демократик партияси етакчиси Владимир Жириновский Ice Bucket Challenge («Бир челак муздек сув синови») акциясида иштирок этди, дея хабар берди Vesti.ru.
Унга Давлат думаси депутати Михаил Дегтярёв чақириқ йўллаган эди. Жириновский эса ўз навбатида Россия Федерацияси Коммунистик партияси етакчиси Геннадий Зюганов, «Справедливая Россия» етакчиси Сергей Миронов ва «Гражданская платформа» партияси асосчиси Михаил Прохоровни акцияда иштирок этишга даъват қилди.
«Агар устингиздан совуқ сув қуймасангиз ёки касал болаларга юз мингдан юбормасангиз — биз сиздан нафратланамиз», — деди у чўмилишдан олдин.
Ice Bucket Challenge флешмобининг мақсади ён амиотрофик склероз деб номланган марказий асаб тизими касаллиги ҳақида хабардорликни оширишдан иборатдир. Хайрия кампаниясини қўллаб-қувватламоқчи бўлган кишилар ўз устидан совуқ сув қуйиши ва буни акс эттирувчи видеоёзувни интернетга жойлаши керак. Шундан сўнг улар ўз дўстлари, ҳамкасблари ва шунчаки танишларига бундай чақирувни йўллайди: агар улар 24 соат ичида муздек сувда чўмилмаса, кампания ташаббускори бўлмиш ALS Association фонди ҳисобига 100 доллар ҳажмида хайрия қилиши керак бўлади. Агар чақириқни қабул қилишса, 10 доллар миқдоридаги тўлов билан чекланиш мумкин.
Шарко касаллиги ёки Лу Гериг касаллиги сифатида ҳам танилган ён амиотрофик склероз қўл-оёқлар фалажлиги ва мускулларнинг қуриши билан кечади. Хасталик ўлимга олиб келиши мумкин, беморлар нафас йўллари инфекцияларидан ёки нафас олиш мускуллари ишламай қолишидан вафот этиши мумкин.
Ушбу акция бутун дунёни, жумладан Россияни ҳам қамраб олди. Чўлпон Хаматова, Дина Корзун, Михаил Боярский, Петербург губернатори вазифасини бажарувчи Георгий Полтавченко ва бошқалар муздек сувда чўмилишга улгурди.
Изоҳ (0)