АҚШ Давлат департаменти баъзи консуллик хизматлари нархини қайта кўриб чиқмоқда, дея хабар берди Korrespondent.ru Давлат департаменти расмий сайтига таяниб.
2014 йил 12 сентябрдан иммиграция визаларининг кўпчилик турлари учун йиғимлар нархи ўзгаради, ноиммиграцион визалар нархи эса аввалгидек қийматда қолади.
Шу тариқа, Давлат департаменти «консуллик хизматларини кўрсатишга кетган харажатларни имкон қадар консуллик йиғими ҳисобидан қоплашга ҳаракат қилмоқда».
«Департамент доимий равишда ушбу чиқимларни таҳлил қилиб бориб, йиғимларни тартибга солишга ҳаракат қилади», — дейилади хабарда.
Энди АҚШ фуқаролари ёки у ерда доимий яшовчилар қариндошлари учун визадан ҳозирги 230 доллар ўрнига 325 доллар ундирилади. АҚШда ишлаш билан боғлиқ визалар бўйича хизматлар эса аксинча, 405 доллардан 345 долларгача арзонлашади.
АҚШ фуқароси билан никоҳ тузмоқчи бўлган чет элликлар учун ҳам виза нархи 240 доллардан 265 долларгача оширилади. Инвесторлар учун визалар нархи эса 270 доллардан 205 долларгача пасайтирилади.
Изоҳ (0)