Коллектив хавфсизлик шартномаси ташкилоти (КХШТ) тинчликпарвар кучлари ҳар қандай, шу билан бирга ташкилотга аъзо мамлакатлар ташқарисидаги, жумладан Украинадаги мураккаб операцияларга ҳам тайёр. Бироқ бу ҳақда унга аъзо мамлакат етакчиларидан иборат Коллектив хавфсизлик кенгаши қарор чиқаради, дея баёнот берди КХШТ бош котиби Николай Бордюжа.
«РИА Новости» ёзишича, Украина жануби-шарқидаги вазият сўнгги кунларда кескин ёмонлашди. Жанговар ҳаракатлар иштирокчилари ўртасида ҳам, тинч аҳоли орасида ҳам юзлаб қурбонлар қайд этилмоқда. Ўтган якшанба куни «Донецк халқ республикаси» бош вазири Александр Захарченко кучлар қарши ҳужумга ўтганини айтди. Яқинда эса айирмачилар украин қўшинлари ва Миллий гвардия гуруҳи Донецк ва Луганскда бир бутун ҳолда ҳаракатланишдан тўхтаганини маълум қилди.
Ўз навбатида, Украина Миллий хавфсизлик ва мудофаа кенгаши қарши ҳужум борасида режа ишлаб чиқилганини эълон қилди.
«КХШТ тинчликпарвар кучлари таркибига кирувчи ҳарбий хизматчилар яхши тайёргарликка эга ҳамда барча зарур қурол-яроғлар ва техника воситалари билан таъминланган. Уларнинг тинчликпарварлик вазифаларини ҳал қилиш қобилиятлари юқори даражададир», — деди Бордюжа, Украина шарқидаги низоларда одамлар қирилишига чек қўйиш учун КХШТ тинчликпарварларидан фойдаланиш имконияти ҳақидаги саволга жавоб берар экан.
«Коллектив хавфсизлик шартномаси ташкилотининг тинчликпарвар кучларидан фойдаланиш имконияти ташкилотнинг Коллектив хавфсизлик кенгашига тегишли алоҳида ҳуқуқдир. Уларнинг мавжуд келишувлар асосидаги биргаликдаги қарори билан тинчликпарвар кучлари ташкилотга аъзо мамлакатлар ҳудудида ҳам, улардан ташқарида ҳам ишга солиниши мумкин», — дея эслатди Бордюжа.
Изоҳ (0)