Қозоғистон ҳеч қачон давлат бўлган эмас. Бу ҳақда Россия Федерацияси президенти Владимир Путин 29 август, жума куни «Селигер» ёшлар форумида айтиб ўтди, деб ёзади UNIAN.
У Қозоғистон президенти Нурсултон Назарбоев «ғаройиб ишни амалга ошириб, шу пайтгача давлат бўлмаган ҳудудда давлат тузган»ини таъкидлади. «Шу маънода Собиқ иттифоқдан кейинги давлатчилик учун у ноёб кишидир», — деди Путин.
Шу билан бирга Россия етакчиси Назарбоевни «доим ўз мамлакатининг келажаги ҳақида қайғурадиган жуда доно ва тажрибали раҳбар» деб таърифлади. «У ҳеч қачон ўз халқи хоҳиш-иродасига қарши бормайди. У халқ нима кутаётганлигини жуда яхши ҳис қилади», — дея қўшимча қилди Путин.
Таъкидлаш жоиз, Владимир Путин Назарбоев Украинанинг Евроиттифоқ билан келишувларини қўллаб-қувватлаши фонида бундай баёнотни берди. 26 август куни Минскда Пётр Порошенко билан учрашув чоғида Назарбоев Божхона иттифоқи бўйича Россия шеригига бу битим зиён келтирмаслигини айтди.
Бундан ташқари, Назарбоев Украина билан самарали ҳамкорлик қилишга ҳам ваъда берди.
Изоҳ (0)