AQSh Davlat departamenti ba’zi konsullik xizmatlari narxini qayta ko‘rib chiqmoqda, deya xabar berdi Korrespondent.ru Davlat departamenti rasmiy saytiga tayanib.
2014-yil 12-sentabrdan immigratsiya vizalarining ko‘pchilik turlari uchun yig‘imlar narxi o‘zgaradi, noimmigratsion vizalar narxi esa avvalgidek qiymatda qoladi.
Shu tariqa, Davlat departamenti “konsullik xizmatlarini ko‘rsatishga ketgan xarajatlarni imkon qadar konsullik yig‘imi hisobidan qoplashga harakat qilmoqda”.
“Departament doimiy ravishda ushbu chiqimlarni tahlil qilib borib, yig‘imlarni tartibga solishga harakat qiladi”, — deyiladi xabarda.
Endi AQSh fuqarolari yoki u yerda doimiy yashovchilar qarindoshlari uchun vizadan hozirgi 230 dollar o‘rniga 325 dollar undiriladi. AQShda ishlash bilan bog‘liq vizalar bo‘yicha xizmatlar esa aksincha, 405 dollardan 345 dollargacha arzonlashadi.
AQSh fuqarosi bilan nikoh tuzmoqchi bo‘lgan chet elliklar uchun ham viza narxi 240 dollardan 265 dollargacha oshiriladi. Investorlar uchun vizalar narxi esa 270 dollardan 205 dollargacha pasaytiriladi.
Izoh (0)