InfoCom-2014 ахборот-коммуникация технологиялари ҳафталиги 22—26 сентябрь кунлари бўлиб ўтади. InfoCom-2014 доирасида ўтказиладиган тадбирларда 20 дан зиёд мамлакатдан ахборот-коммуникация технологиялари соҳаси ишлаб чиқарувчилари, компания ва экспертларнинг иштирок этиши кутилмоқда.
Ҳафталик доирасида 22 сентябрь куни «Ёшлар ижод саройи»да бўлиб ўтадиган Bestsoft Uzbekistan-2014 кўргазмасида 40 дан ортиқ компаниялар ўз маҳсулотлари билан иштирок этиши кутилмоқда. Кўргазма 450 квадрат метр майдонни қамраб олиши кўзда тутилган. «Ишланмаларни тайёрлаш воситалари», «Лойиҳаларни амалга ошириш», «Таълим», «Ахборот хавфсизлиги», «Мултимедиа ва дизайн» мавзулари кўргазманинг асосий йўналишлари ҳисобланади.
Миллий Uz домени-2014 интернет фестивали 15 июлдан 22 сентябргача давом этишини маълум қилган эдик. Фестивал натижалари ва ғолибларни тақдирлашга бағишланган тадбир 22 сентябрь куни «Ёшлар ижод саройи»да ташкил этилади. Фестивал ғолиблари 10 та мавзули ва 2 та махсус йўналишлар бўйича саралаб олинади.
Бу йил Ахборот-коммуникация технологиялари бўйича саммит (АКТ Саммит-2014)да иштирок этувчи мутахассис ва экспертлар сони 500 нафарга етди. Саммит қуйидаги уч муҳим йўналишларда ташкил этилади: «Давлат секторида АКТдан фойдаланиш», «Тадбиркорликда АКТдан фойдаланиш», «Интернет ва ахборот ресурслари». Саммит якунида мавзу ва йўналишлар бўйича таклифлар ва Саммит қарори қабул қилинади. АКТ Саммит-2014 23 сентябрь куни Халқаро ҳамкорлик марказида ташкил этилади.
Шунингдек, 23 сентябрь куни «Туркистон» саройида ёшлар ўртасида ўтказилган MIT.UZ миллий интернет танлови ғолибларини тақдирлаш маросими бўлиб ўтади. Жорий йилда танлов 10 та асосий ҳамда 4 та қўшимча йўналишлар бўйича ташкил қилинмоқда. Унда 14 ёшдан 30 ёшгача бўлган Ўзбекистон фуқаролари иштирок этишлари мумкин. Танловга тақдим этилган ишлар нафақат ҳакамлар, балки интернет фойдаланувчилари томонидан ҳам баҳоланади.
InfoCom-2014 АКТ ҳафталиги доирасида 24—26 сентябрь кунлари Тошкент, Урганч ва Гулистон шаҳарларида бир вақтнинг ўзида анъанавий ICTExpo-2014 миллий ахборот технологиялари кўргазмаси ҳам бўлиб ўтади. Кўргазма бир қатор хилма-хил лойиҳалар, семинар ва давра суҳбатлари, шу билан биргаликда, турли акция ва танловларни ўз ичига олган. Уч кун давом этадиган кўргазмага 35 минг нафар киши келиши кутилмоқда. ICTExpo-2014 кўргазмаси АКТ соҳасида ўзаро ҳамкорлик ўрнатиш ва мустаҳкам тижорат алоқаларини боғлашда янги имконият бўлиб хизмат қилади. Кўргазма ниҳоясида ташкилий қўмита томонидан стенд ва бўлимлари энг яхши деб топилган ғолиблар мукофотланади.
24 сентябрь куни соат 15:00 да «Кўргазма савдо маркази» комплексида Ўзбекистонда интернет провайдинг ва миллий контентнинг ривожига бағишланган давра суҳбати бўлиб ўтади.
26 сентябрь куни «Пойтахт» бизнес-марказида «‘Электрон ҳукумат’ ҳукумат платформасида ахборот воситалари ривожланишини қонуний тартибга солиш» мавзуидаги халқаро семинар бўлиб ўтади. Семинар якунида ишлаб чиқилаётган қонун лойиҳалари, «электрон ҳукумат» тизимини жорий қилиш доирасида ишлаб чиқилаётган ахборот тизимлари ва маълумотлар базалари комплекси инфратузилмаси ва интеграциясига қўйиладиган талабларга доир таклифлар кўриб чиқилиши белгиланган.
Компьютер ўйинлари бўйича Ўзбекистон миллий чемпионатнинг якуний босқичи 29 сентябрь куни бўлиб ўтади. Мазкур финал ғолиблари WCG-2014 жаҳон чемпионатида иштирок этиш ҳуқуқини қўлга киритади.
Эслатиб ўтамиз, Uzbekistan CyberGames-2014 компьютер ўйинлари бўйича Ўзбекистон миллий чемпионатига жорий йилнинг 16—17 август кунлари Бухорода старт берилган эди. Ўзбекистон чемпионатининг навбатдаги турнири Самарқандда 23—24 август кунлари ўтказилди.
FIFA14 бўйича Ўзбекистон чемпиони эса Францияда бўлиб ўтадиган ESWC2014 жаҳон кубоги финалида қатнашиш ҳуқуқига эга бўлади.
Изоҳ (0)