«Тошкент, сени севаман!» фильми учун сценарийлар танлови эълон қилинди

Тошкентдаги «Кинопром» компанияси «Тошкент, сени севаман!» кинотўпламини ишлаб чиқаришга киришмоқда, шу мақсадда профессионал сценарийнавислар ва драматурглар ўртасида сценарийлар танловини эълон қилди. Танлов ҳакамлари кинотўплам асосини ташкил этувчи ўнта энг яхши асарни танлаб олади. Бу ҳақда Kinoshniki.uz хабар берди.

«Тошкент, сени севаман!» турли режиссёрлар томонидан яратилган ва бир-бири билан боғлиқ бўлмаган беш дақиқалик ўнта киноновелладан иборат бўлади. Ўз шаклига кўра, лойиҳа Франциянинг «Париж, сени севаман!», Американинг «Нью-Йорк, сени севаман!», Россиянинг «Москва, сени севаман!» фильмларини такрорлайди.

Лойиҳа ташаббускори «Кинопром» компаниясидир. Фильм тайёр бўлгач, дунёнинг 200 та кинофестивалига тўлиқ шаклда ёки қисман юборилади. Бундан ташқари, кинотеатрларда намойиш этилади, шунингдек интернетдаги оммабоп кинопорталларга жойлаштирилади.

Сценарийлар учун хиёнат, худбинлик, кўр севги, рашк, эҳтирос ва бевафолик каби ўнта мавзу тақдим этилди.

Иштирокчилардан сценарийларнинг одоб-ахлоқ талабларига жавоб бериши, миллий менталитетни ҳисобга олиши сўраб қолинган. Сценарийларни қабул қилиш муддати 31 август куни тугайди.