Хитойнинг Хебей провинциясида кучли ёмғирдан сўнг юзага келган кўчки оқибатида камида 4 киши ҳалок бўлиб, яна 8 нафар одам бедарак йўқолди. Бу ҳақда маҳаллий оммавий ахборот воситаларига таяниб Arab News хабар берди.
Кўчки Ченду шаҳри яқинидаги қишлоқда рўй берган. Расмийларга кўра, бу табиий офат “ғайриоддий кучли ёғингарчилик” туфайли содир бўлган. Хебейда юзага келган жиддий сув тошқинларини ўрганиш учун фавқулодда вазиятлар бошқармаси махсус гуруҳ юборган. Фупин округида 4 600 дан ортиқ одам хавфсиз ҳудудларга кўчирилган.
Қўшни Шанси провинциясида эса автобус ҳалокати оқибатида 13 киши бедарак йўқолган, бир нафар шахс қутқариб олинган. Пойтахт Пекинда ҳам кучли ёмғир оқибатида шаҳар чеккасидаги Миюнь провинциясида 3 мингдан ортиқ одам эвакуация қилинган. Бу ҳудуддаги сув омборида 60 йил ичида энг катта сув ҳажми қайд этилган.
28 июль куни омбор яқинидаги Мужияю шаҳарчасида электр линиялари лой оқими билан ювиб кетилган. Пекин ҳукумати ёмғир бўйича иккинчи, тошқинлар бўйича эса энг юқори даражадаги огоҳлантириш эълон қилган. Кучли ёғингарчилик 29 июлгача давом этиши прогноз қилинган.
Хитойда ёз ойларида табиий офатлар — кучли ёмғир ва жазирама иссиқ одатий ҳолга айланган. Мамлакат глобал иқлим ўзгаришига сабаб бўлувчи иссиқхона газлари ишлаб чиқаришда етакчи саналади. Шу билан бирга, Хитой 2060 йилгача углерод нейтраллигига эришишни мақсад қилган.
Изоҳ (0)