Ўзбекистонда «Жигули»ларни расмийлаштириш билан боғлиқ чеклов бекор қилинди

Аввалроқ МДҲ давлатларида ишлаб чиқарилган автомобиллар билан боғлиқ нотариал ҳаракатларга қўйилган чеклов олиб ташланди. Бу ҳақда Facebook’даги «Водители Ташкента» («Тошкент ҳайдовчилари») гуруҳи аъзолари хабар бермоқда.

«Россия ва Украина автомобилларини расмийлаштириш мумкин бўлди, — деб ёзади фойдаланувчилардан бири. — Божлар ўша-ўша, ҳеч нарса ўзгармаган».

Фойдаланувчининг айтишича, бундай қарор Тошкент шаҳар адлия бошқармасидан шаҳар нотариусларига келиб тушган. «Нотариусга қўнғироқ қилиб сўраганимда улар буни тасдиқлади», — дея қайд этди у.

Постга билдирилган фикрларнинг ярмида гуруҳ аъзолари бундай яхши янгилик учун миннатдорчилик билдирган бўлса, қолган қисми аслида МДҲда чиққан автомобилларни расмийлаштириш аввал ҳам бекор қилинмагани, бу шунчаки миш-миш эканини айтган.

Пост муаллифи эса далил сифатида МДҲ автомобиллари билан боғлиқ нотариал ҳаракатларни чеклаш ҳақидаги ҳужжат нусхаси суратини илова қилди.