Инқилоб келиб чиқишидан қўрқиб, Асқар Акаев Бишкекдаги акасининг дафн маросимига келмади

Қирғизистон собиқ президенти Асқар Акаев мамлакатда учинчи инқилобни келтириб чиқаришидан қўрқиб, Москва аэропортига кетиш йўлида Бишкекка ташрифини бекор қилди. Бу ҳақда Қирғизистон бош вазири аппарати собиқ раҳбари Бекпўлат Талгарбековга асосланиб, «КирТАГ» хабар берди.

Акаевлар оиласига яқин бўлган Талгарбековнинг айтишича, у ўғли билан аэропортга йўл олган собиқ президентга қўнғироқ қилиб, вазиятдан огоҳ этган. Агар Акаев ҳибсга олинса, унинг тарафдорлари намойишлар уюштириши хавфи борлиги, натижада учинчи инқилоб юзага келиши мумкинлигини айтган. Шундан сўнг, Бишкекка Акаевнинг ўғли Илим етиб келган.

Асқар Акаевнинг акаси Пўлат Акаев 3 август куни Бишкекда вафот этди. Собиқ президент дафн маросимига келиши кутилаётган бир вақтда республика бош прокурори назорат органларида унга бериладиган қатор саволлар борлигини маълум қилди.

2005 йилда Акаевга нисбатан  тинч аҳолини ўққа тутиш, қирғиз ерларини Қозоғистонга бериб юбориш, давлат мулкини тортиб олиш айбловлари бўйича жиноят ишлари очилган эди. Бироқ Қирғизистондаги иккинчи инқилоб чоғида Акаевга нисбатан жиноий иш ҳужжатлари бош прокуратура биноси билан биргаликда ёниб кетган. Ўша кун — 2010 йил 7 апрелдан собиқ президентга нисбатан айбловлар бекор бўлган ҳисобланади.

Акаев 1990 йил октябрда Қирғизистон президентлигига сайланган, 2005 йил мартида инқилоб натижасида мамлакатни тарк этган. Айни пайтда у Москвада яшайди.