Япония 2019 йилгача ўз-ўзини мудофаа қилиш кучлари таркибида биринчи космик бўлинмани тузади. Бу ҳақдаги хабарномани мамлакат мудофаа вазирлиги АҚШ ҳукуматига тақдим этди, деб ёзади «РИА Новости».
Янги бўлинманинг асосий вазифаси ўз ишини тугатиб бўлган сунъий йўлдошлар, ракеталар ва бошқа космик чиқиндиларни кузатиш ҳамда уларнинг фаол учувчи қурилмалар билан тўқнашиб кетиши олдини олишдан иборат бўлади. Олинган маълумотларни ўз-ўзини мудофаа қилиш кучлари америкалик ҳамкасблари билан бўлишади ва шу тариқа космик соҳада АҚШ билан ҳамкорликни йўлга қўяди.
Ҳар иккала мамлакатнинг коинот соҳасида ҳамкорликка интилишига 2007 йилда Хитой томонидан сунъий йўлдошларни кўзлаб синов тариқасида отилган ракеталар сабаб бўлди. Ўшанда ўқ тегиши натижасида сунъий йўлдош уч минг бўлакка бўлинган, улар ҳали ҳам коинотда бўлиб, алоқа йўлдошлари ва жосус йўлдошларга зарар етказиши мумкин.
Август ойида Япония мудофаа вазирлиги космик макондан фойдаланиш концепциясини тасдиқлагач, бўлинма тузилиши бошланади.
Изоҳ (0)