Фрэнк Лэмпард ижара асосида «Манчестер Сити»да ўйнайди

АҚШнинг «Нью-Йорк Сити» жамоаси ярим ҳимоячиси Фрэнк Лэмпард ижара асосида «Манчестер Сити»да тўп суради. Бу ҳақда The Guardian хабар бермоқда, деб ёзади «Кун».

Лондоннинг «Челси» жамоаси собиқ сардори Премьер-лиганинг амалдаги ғолиби сафида бир неча ой давомида тўп суради. Лэмпард «шаҳарликлар» ўйинчиси сифатида Англия чемпионати ва Чемпионлар лигасига заявка қилиниши кутилмоқда.

36 ёшли футболчининг АҚШ MLS лигасида иштирок этувчи «Нью-Йорк Сити» жамоаси билан амалдаги шартномаси икки йил муддатга мўлжалланган.

Англиялик ярим ҳимоячи 13 йил давомида Лондоннинг «Челси» жамоасида тўп сурган. «Кўклар» сафида Лэмпард уч марта Англия чемпиони бўлди, бир мартадан Европа Чемпионлар лигаси ва Европа Лигасида ғолиб чиқди.

Футболчи тўрт марта Англия Кубогида, икки марта эса Англия Лига Кубогида ғолиб чиққан. Англия терма жамоаси сафида 106 ўйинда майдонга тушган Лэмпард ушбу ўйинларда 29та гол уришга муваффақ бўлган.

Аввалроқ, АҚШнинг «Нью-Йорк Сити» жамоаси бошқа бир машҳур футболчи Испания терма жамоаси ва «Барселона» собиқ ҳужумчиси Давид Вилья билан шартнома имзолаганди. Бироқ бу футболчи ҳам уч ой давомида ижара асосида Австралиянинг «Мельбурн Сити» жамоасида тўп суради.