Ғазо секторидаги «Мудофаа чизиғи» операциясининг қурбонлари сони 800 га етди. БМТ маълумотларига кўра, улардан 500 нафари тинч аҳоли (камида 170 бола, 86 нафар аёл)ни ташкил қилади. Шунингдек, 5000 нафар фаластинлик жароҳат олди, деб хабар берди Euronews.
24 июль куни Байт-Ҳанун шаҳридаги БМТ мактабига амалга оширилган авиаҳужум натижасида миссия ходимларини ҳам қўшиб ҳисоблаганда, камида 17 киши ҳалок бўлгани, 200 га яқини жароҳатлангани қайд этилди. Авиаҳужум ким томонидан уюштирилгани ҳозирча аниқланган эмас. Исроил армияси ахборот хизматида эса бу ракеталар ҲАМАС гуруҳига тегишли экани ҳақида айтилган.
БМТ Яқин шарқ бўйича агентлигининг фаластинлик қочоқларга ёрдам бериш ва ишларни ташкиллаштириш бўйича вакили Крис Гуннеснинг айтишича, БМТ мактабида тинч аҳоли яширинган. Урушаётган томонлар, айниқса, Исроил бинонинг аниқ манзили ҳақида аниқ маълумотга эга бўлган.
Исроил мудофаа армиясининг ахборот хизмати Байт-Ҳанун туманининг бир неча кундан бери ҲАМАС жангариларига қарши кураш майдонига айланганини таъкидламоқда. Пайшанба куни у ердан аҳолини кўчириш учун тўрт соатлик гуманитар коридор очилган.
Исроил Ташқи ишлар вазирлигининг вакили эса бу урушнинг ҲАМАС ташкилоти томонидан тинч аҳолидан жонли қалқон сифатида фойдаланилаётгани учун давом этаётганини айтди.
«Мудофаа чизиғи» операцияси давомида Исроил томондан 32 нафар ҳарбий ва икки фуқаро ҳалок бўлди.
Изоҳ (0)