АҚШ президенти Барак Обаманинг кортежи туфайли Лос-Анжеласда ҳомиладор аёл туғруқхонага етиб олиш учун ярим соат кутиб ўтирди. Бу ҳақда АҚШ ва Британия газеталарига таяниб, «РИА Новости» хабар берди.
Дарди тута бошлаган аёл Sedars-Sinai тиббий марказига йўл олган, бироқ Обаманинг кортежи ўтиши учун йўллар тўсиб қўйилганидан кўчани кесиб ўта олмаган ва автобус бекатида ярим соатча кутиб қолган.
Воқеа гувоҳларидан бири ўша пайтдаёқ Twitter’га бу ҳақда ёзган ва далил сифатида бекатдаги ҳомиладор аёл суратини илова қилган. «Бу аёлнинг дарди тутган, бироқ Обамани деб Cedars’га бора олмаяпти», — деб ёзган у.
https://twitter.com/CarrieClifford/statuses/492091246806974464
Blaze нашрининг хабарига кўра, Twitter’да #ObamaBabyWаtch ҳештеглари пайдо бўлган. Фойдаланувчилар бундай ҳештег остида ҳодиса ҳақидаги янгиликларга линклар қўйган ва Обамага нисбатан норозилик билдирган.
Daily Mail ёзишича, Лос-Анжелес полицияси вакили Обама туфайли туғруқхонага етиб бора олмаган ҳомиладор аёл ҳақидаги маълумотни тасдиқлаган. У полициячилар аёлда дард бошланганидан бехабар бўлганини билдирган.
Кейинроқ аёлнинг шифохонага етиб бориб, эсон-эмон туғиб олгани хабар қилинди.
Изоҳ (0)