Рим суди италиялик фойдаланувчилар учун Россиянинг Mail.ru порталини ёпиб қўйди. суд портални ўғриликда айбламоқда. Бу ҳақда «Российская газета» хабар берди.
Италияда киномаҳсулотларни ишлаб чиқариш ва тарқатиш билан шуғулланувчи Eyemoon Pictures студияси судга мурожаат қилиб, Mail.ru портали 2013 йилда чиқарилган Fruitvale Station ва The Congress фильмларининг нусхаларини интернетда ноқонуний равишда тарқатаётганини маълум қилган.
Шикоят асосида тергов ўтказилганида Mail.ru ҳамда яна бир қатор торрент-манбалар ва сайтлар студиянинг муаллифлик ҳуқуқини бузаётгани аниқланган.
16 июлдан италиялик фойдаланувчилардан Mail.ru ишламаётгани ҳақида хабарлар келиб туша бошлаган. Портал вакиллари вазиятдан хабардор экани ва уни ҳал қилиш билан шуғулланаётганини маълум қилган.
Mail.ru тарқатган расмий хабарда айтилишича, Eyemoon Pictures ишни судга оширмасдан туриб, вазиятни тартибга солишга ҳаракат қилмаган. «Студиядан ҳам, Италия ҳуқуқни муҳофаза қилиш органларидан ҳам ноқонуний контент жойлангани ҳақида хабар ёки уни олиб ташлаш талаби келиб тушмади, — дейилади баёнотда. — Ушбу материаллар бизнинг кўп сонли сервисларимизнинг айнан қайси бирида эканини айни пайтда аниқлаш қийин. У фойдаланувчилар томонидан юклаб қўйилган видеолар орасида бўлиши ҳам мумкин».
Mail.ru вазиятни тартибга солиш учун чора-тадбирлар кўришини айтди.
Изоҳ (0)