1 июль куни Ўзбекистон Вазирлар Маҳкамаси «Ўрта махсус, касб-ҳунар таълими ўқув муассасалари ўқувчилари ўртасида «Баркамол авлод — 2014» спорт мусобақалари ўтказилиши якунлари тўғрисида» қарор қабул қилди. Унда шу йил 29—31 майда Наманган шаҳрида ўтказилган «Баркамол авлод — 2014» спорт мусобақалари якунлари билан боғлиқ маълумотлар берилиши билан бирга, ёшларни спорт билан шуғулланишга жалб этиш ишлари зарур даражада ташкил этилмагани учун баъзи вилоятлар танқид қилинди.
Болаларнинг спорт машғулотлари билан қамраб олинишини ошириш учун зарур шарт-шароитлар яратиш, спорт иншоотларининг моддий-техника базасини мустаҳкамлаш бўйича тизимли ишлар ташкил этилганлиги, шунингдек «Баркамол авлод — 2014» спорт ўйинларининг якунловчи босқичида тегишли жамоаларнинг иштироки натижалари бўйича эришилган юқори спорт кўрсаткичлари учун Тошкент шаҳри ҳокими Р.Ж. Усмоновга, Наманган вилояти ҳокими Б.Т. Юсуповга ва Самарқанд вилояти ҳокими З.Т. Мирзаевга, шунингдек, «Баркамол авлод — 2014» мусобақаларида юқори натижаларга эришишга улуш қўшган ўрта махсус, касб-ҳунар таълимининг ҳудудий бошқармалари ва маданият ва спорт ишлари бошқармалари раҳбарларига ҳамда ўқувчилари ва тарбияланувчилари «Баркамол авлод — 2014» мусобақаларида энг яхши натижалар кўрсатган академик лицейлар ва касб-ҳунар коллежлари раҳбарларига ва минтақавий жамоаларнинг тренерларига ташаккурнома билдириш ҳақида қарор қилинди.
Спорт объектларидан фойдаланишнинг етарлича самарадорлиги таъминланмаганлиги, болалар спортини ривожлантириш бўйича амалга оширилаётган ишларнинг даражаси пастлиги ва жамоаларнинг қониқарсиз якуний натижалари учун Қорақалпоғистон Республикаси Вазирлар Кенгаши Раиси Б.Я. Янгибоевга, Сирдарё вилояти ҳокими О.Ш. Ашурматовга ва Жиззах вилояти ҳокими С.У. Исмаиловга ҳайфсан эълон қилинди.
«Баркамол авлод — 2014» ёшлар ўйинларининг бошланғич босқичларига тайёргарлик кўриш ва ўтказишдаги нуқсонлар ва камчиликлар учун Ўрта махсус, касб-ҳунар таълими маркази директори У.З. Салимов огоҳлантирилди, Ўрта махсус, касб-ҳунар таълими маркази директорининг биринчи ўринбосари Х.Ф. Зикриллаевга эса ҳайфсан эълон қилинди.
Бундан ташқари, ишда йўл қўйилган камчиликлар учун Сирдарё (Б. Исматов) ва Жиззах (М. Юсупов) вилоятлари маданият ва спорт ишлари бошқармалари бошлиқлари, Қорақалпоғистон Республикаси Маданият ва спорт ишлари вазирининг ўринбосари (Д. Калхурозов), шунингдек Қорақалпоғистон Республикаси ўрта махсус, касб-ҳунар таълими бошқармаси бошлиғи (Д. Иззатуллаев) эгаллаб турган лавозимидан озод қилинди.
Сирдарё (Н. Эгамбердиев) ва Жиззах (Ш. Турдиев) вилоятлари ўрта махсус, касб-ҳунар таълими бошқармалари бошлиқларига ҳайфсан эълон қилинди.
Изоҳ (0)