Дарсликларни электрон шаклда ўқишга мўлжалланган «E-darslik» мобил дастурини Google Play’да юклаб олиш мумкин бўлди

UzInfocom маркази ва Global Solutions компанияси томонидан ишлаб чиқилган «E-darslik» дастурини энди Google Play’да ҳам кўчириб олиш мумкин бўлди. Бу ҳақда UzInfocom корпоратив блоги хабар берди.

Шу пайтгача ушбу дастурни фақат ZiyoNet порталида юклаб олиш мумкин эди.

Блогнинг маълум қилишича, AppStore’га ҳам ариза берилган бўлиб, яқин орада iOS эгалари ҳам «E-darslik»ни юклаб олиши мумкин бўлади.

Эслатиб ўтамиз, мобил дастурда дарсликлар кутубхонаси мавжуд бўлиб (бугунги кунда 40 дан ортиқ дарсликлар), фойдаланувчи уларни ўзининг «китоб жавонига», яъни қурилманинг «Менинг китобларим» бўлимига юклаб олиши мумкин. Дарсликларни қидириш учун дарсликнинг қайси тилда, қайси фан ва синфга тегишли эканлигини танлаш имкониятини берувчи махсус филтрдан фойдаланиш мумкин.

Керакли дарсликлар танланганидан сўнг, улар телефон ёки планшетга юклаб олинади. Ушбу жараён амалга оширилгандан кейин эса, дарсликлардан Интернет тармоғига уланмасдан туриб фойдаланиш мумкин бўлади.