UzInfocom markazi va Global Solutions kompaniyasi tomonidan ishlab chiqilgan “E-darslik” dasturini endi Google Play’da ham ko‘chirib olish mumkin bo‘ldi. Bu haqda UzInfocom korporativ blogi xabar berdi.
Shu paytgacha ushbu dasturni faqat ZiyoNet portalida yuklab olish mumkin edi.
Blogning ma’lum qilishicha, AppStore’ga ham ariza berilgan bo‘lib, yaqin orada iOS egalari ham “E-darslik”ni yuklab olishi mumkin bo‘ladi.
Eslatib o‘tamiz, mobil dasturda darsliklar kutubxonasi mavjud bo‘lib (bugungi kunda 40 dan ortiq darsliklar), foydalanuvchi ularni o‘zining “kitob javoniga”, ya’ni qurilmaning “Mening kitoblarim” bo‘limiga yuklab olishi mumkin. Darsliklarni qidirish uchun darslikning qaysi tilda, qaysi fan va sinfga tegishli ekanligini tanlash imkoniyatini beruvchi maxsus filtrdan foydalanish mumkin.
Kerakli darsliklar tanlanganidan so‘ng, ular telefon yoki planshetga yuklab olinadi. Ushbu jarayon amalga oshirilgandan keyin esa, darsliklardan Internet tarmog‘iga ulanmasdan turib foydalanish mumkin bo‘ladi.
Izoh (0)