Amazon 3D-тасвирларни кўзойнаксиз кўриш имконини берувчи янги смартфонини тақдим этди

Америка интернет-ритейлери — Amazon ўзининг Fire Phone деб номланган смартфонини расман тақдим этди. Компания асосчиси Жефф Безос янги қурилма тақдимотини ўтказди. Бу ҳақда Mobinfo.uz хабар берди.

Янги смартфон 4,7 дюймли 1280×720 пикселли экран, 4 ядроли Qualcomm Snapdragon 800 процессори, 2 Гб тезкор ва 32/64 Гб ички хотирага эга. Телефон аккумулятори сиғими 2400 мА/с га тенг, бу 11 соат давомида видео кўриш имконини беради.

Fire Phone Fire OS 3.5 — Android’нинг модификацияланган фойдаланувчи интерфейсида ишлайди. Смартфон корпуси кучайтирилган ром билан жиҳозланган, қурилмадаги тугмалар алюминийдан қилинган.

Янги смартфон бирйўла 6 та камерага эга. 13 мегапикселли асосий — орқа ва олд камера одатийдир. Қолган 4 та модул эса олд панел бурчакларида жойлашган бўлиб, 3D-еффект яратишда қўлланилади. Ушбу паст кучланишли инфрақизил камералар фойдаланувчи юзи (кўзи)нинг экранга нисбатан жойлашувини кузатади ва унга 3D-объектларни махсус кўзойнаксиз кўриш имконини беради.

Нафақат телефон экранидаги фон ва иконкалар, балки Amazon интернет-дўконидаги маҳсулотлар ҳам 3D шаклда акс этади.

Смартфон нархига келсак, қурилма АҚШда АТ&Т оператори билан икки йиллик шартнома тузилган тақдирда 200 долларга сотилади. Алоҳида харид қилганда 650 долларга тушади. Fire Phone 25 июлдан сотила бошлайди.