Оммабопликда Samsung Galaxy S5’ни ортда қолдирган LG G3 дунё бўйича сотила бошлайди

LG компанияси ўзининг янги G3 флагман смартфони дунё бўйича сотила бошлаганини эълон қилди. Айни пайтда уни фақат Кореяда расман сотиб олиш мумкин, бироқ 27 июндан бошлаб қурилмани Гонконг, Индонезия, Сингапур ва Филиппин аҳолиси ҳам харид қилиши мумкин бўлади.

Mail.ru хабар беришича, Осиёдаги қолган мамлакатлар ва Европада эса LG G3 июлдан сотила бошлайди.

Аввалроқ Жанубий Кореяда Samsung Galaxy S5’га нисбатан LG G3 смартфони кўпроқ сотилаётгани хабар қилинган эди. Жанубий Кореяда сотувга чиқарилганидан бир неча кун ўтиб, 25—30 мингта LG G3 сотилган, бу LG G2’нинг ўтган йилги кўрсаткичидан деярли икки марта ва Galaxy S5’нинг дастлабки савдо ҳажмидан уч марта кўп демакдир.

Эслатиб ўтамиз, янги телефон «ромсиз» дизайн, орқа панелдаги сезиларсиз тугмалар ва силлиқланган металл текстурасига эга.

LG G3 5,5 дюймли 2560×1440 пикселли дисплей, тўрт ядроли Qualcomm Snapdragon 805 процессори, 3 Гб тезкор, 16/32 Гб ички хотира, 13 мегапикселли олд камера ҳамда 3000 mAh сиғимидаги аккумулятор билан жиҳозланган.

27 май куни янги смартфон Сан-Франциско, Нью-Йорк ва Лондонда, бир кундан кейин Сеул, Сингапур ва Истанбулда тақдим этилди.