Жаҳон банки Ўзбекистон ҳукуматига 2014—2015 йилларда 660,8 миллион долларлик кредит ажратиши мумкин. Бу ҳақда «Новый век» хабар берди.
Жаҳон банки маълум қилишича, мамлакат билан шериклик стратегиясига киритилган тўртта лойиҳа ишлаб чиқиш босқичида турибди. Хусусан, шу йилнинг иккинчи ярмида банк Қорақалпоғистон республикасида дренаж тизимини модернизация қилиш учун 260,8 миллион доллар тақдим этади.
2015 йил бошида Жаҳон банки «Ўзбекистон темир йўллари» давлат акциядорлик компаниясига 200 миллион доллар кредит тақдим этади. У Қамчиқ довони орқали мамлакат шарқига қуриладиган темир йўл линиясига сарфланади. Бундан ташқари, боғдорчиликни ривожлантиришга 150 миллион доллар, таълим соҳасидаги ислоҳотлар учун 50 миллион доллар кредит ажратиш кўзда тутилган.
Кредитлар Жаҳон банки гуруҳига кирувчи Халқаро тараққиёт ассоциацияси томонидан ажратилади ва 40 йил муддатга (жумладан 10 йиллик имтиёзли муддат) 0,75% йиллик ставка билан тақдим этилади.
Изоҳ (0)