Саудия Арабистонида 90 ёшли ўқувчи пайдо бўлди. Фуқаро яшаётган вилоятда саводсизликни тугатиш кампанияси бошлангани муносабати билан ўз таълимини якунлашга қарор қилди. Бу ҳақда Ал-Арабия хабар бермоқда.
Овайд Ража ал-Аджий Табук вилояти Тайма тумани ал-Жаҳра шаҳридаги катталар учун мўлжалланган таълим марказига қатнашни бошлади. «Автомобиль ҳалокатидан сўнг қолган тиззамдаги кучли оғриқларга қарамай, мен ўз таълимимни тугатишга қарор қилдим», – дейди 90 ёшли ўқувчи.
«Кун»нинг хабар беришича, Саудия Арабистонининг минтақавий таълим департаменти қайд этилган вилоятдаги саводсизликни тугатишга қаратилган кампанияни йўлга қўйган эди.
Саводсизликни тугатиш Саудия Арабистони ҳукумати олдида турган асосий вазифалардан бири бўлиб, ҳукумат ушбу масалани муваффақиятли уддаламоқда. Араб News’нинг Саудия таълим вазирлиги ҳисоботига асосланиб хабар беришича, сўнгги тўққиз йилда мамлакатда саводсизлик даражаси 61 фоизга қисқарган. Бу эса 2000 йили бўлиб ўтган «Дакар форуми»нинг режа кўрсаткичларидан юқоридир. Ўшанда иштирокчи мамлакатларга ўз мамлакатидаги саводсизлик даражасини 50 фоизга қисқартириш таклиф қилинган эди.
Саудия Арабистони таълим вазирлиги маълумотларига кўра, ҳозирги кунда мамлакатдаги эркакларнинг 4 фоизи, аёлларнинг эса 10 фоизи саводсиз бўлиб қолмоқда. Саводсизликнинг ўртача даражаси эса 2005—2006 йиллардаги 18 фоиздан ўртача 7 фоизга қисқарган. Бунда таълим вазирлиги томонидан ишлаб чиқилган катталар орасида саводсизликни тугатишга қаратилган дастур муҳим рол ўйнади.
Изоҳ (0)