Saudiya Arabistonida 90 yoshli o‘quvchi paydo bo‘ldi. Fuqaro yashayotgan viloyatda savodsizlikni tugatish kampaniyasi boshlangani munosabati bilan o‘z ta’limini yakunlashga qaror qildi. Bu haqda Al-Arabiya xabar bermoqda.
Ovayd Raja al-Adjiy Tabuk viloyati Tayma tumani al-Jahra shahridagi kattalar uchun mo‘ljallangan ta’lim markaziga qatnashni boshladi. “Avtomobil halokatidan so‘ng qolgan tizzamdagi kuchli og‘riqlarga qaramay, men o‘z ta’limimni tugatishga qaror qildim”, – deydi 90 yoshli o‘quvchi.
“Kun”ning xabar berishicha, Saudiya Arabistonining mintaqaviy ta’lim departamenti qayd etilgan viloyatdagi savodsizlikni tugatishga qaratilgan kampaniyani yo‘lga qo‘ygan edi.
Savodsizlikni tugatish Saudiya Arabistoni hukumati oldida turgan asosiy vazifalardan biri bo‘lib, hukumat ushbu masalani muvaffaqiyatli uddalamoqda. Arab News’ning Saudiya ta’lim vazirligi hisobotiga asoslanib xabar berishicha, so‘nggi to‘qqiz yilda mamlakatda savodsizlik darajasi 61 foizga qisqargan. Bu esa 2000-yili bo‘lib o‘tgan “Dakar forumi”ning reja ko‘rsatkichlaridan yuqoridir. O‘shanda ishtirokchi mamlakatlarga o‘z mamlakatidagi savodsizlik darajasini 50 foizga qisqartirish taklif qilingan edi.
Saudiya Arabistoni ta’lim vazirligi ma’lumotlariga ko‘ra, hozirgi kunda mamlakatdagi erkaklarning 4 foizi, ayollarning esa 10 foizi savodsiz bo‘lib qolmoqda. Savodsizlikning o‘rtacha darajasi esa 2005—2006-yillardagi 18 foizdan o‘rtacha 7 foizga qisqargan. Bunda ta’lim vazirligi tomonidan ishlab chiqilgan kattalar orasida savodsizlikni tugatishga qaratilgan dastur muhim rol o‘ynadi.
Izoh (0)