Ўзбекистонда Gentra'ни ишлаб чиқариш тўхтатилиши ҳақидаги хабар рад этилди

Ўзбекистонда Daewoo Gentra / Chevrolet Lacetti автомобилини чиқариш тўхтатилиши ҳақидаги миш-мишларга жавобан, «Ўзавтосаноат» ушбу гап-сўзларнинг асоссиз эканини таъкидлади. Бу ҳақда Anhor.uz хабар берди.

Маълум бўлишича, Ўзбекистон автосалонларида Daewoo Gentra учун шартномалар йўқ. Driver’s Village салонидагилар ҳам Cobalt ва бошқа автомобилларга шартномаларнинг борлиги, бироқ айнан Gentra учун айни пайтда йўқлигини маълум қилишган. Шу ва шу каби вазиятлар машинанинг бошқа чиқарилмаслиги ҳақидаги шов-шувни янада кучайтирган.

Бироқ «Ўзавтосаноат» матбуот хизматининг нашрга маълум қилишича, бундай гап-сўзлар ҳақиқатдан йироқ. «Модел янги, ишлаб чиқариш яқинда йўлга қўйилди, шунинг учун уни чиқариш тўхтатилиши ҳақида гап ҳам бўлиши мумкин эмас», — деди матбуот котиби. Шартномаларнинг йўқлигини эса жорий йил учун олдиндан буюртмаларнинг барчаси қилиб бўлингани билан изоҳлади.

Эслатиб ўтамиз, Daewoo Gentra 2013 йил ноябрида Ўзбекистонда расман тақдим этилди. Автомобиль нархлари комплектацияга қараб 40 770 600 сўмдан 58 727 400 сўмгача белгиланган.