2014 йилда Сурхондарё вилоятида 2 500 тоннадан зиёд балиқ етиштириш режалаштирилган. Бунинг учун 25 янги балиқчилик хўжалиги ташкил этилиб, тижорат банклари томонидан 300 миллион сўмга яқин имтиёзли кредит ажратилади, деб хабар бермоқда ЎзА.
Жорий йилнинг ўтган даврида тижорат банклари томонидан соҳага 120 миллион сўмдан ортиқ кредит маблағи ажратилди. «Сурхонбалиқнаслчилик» ўқув-амалиёт ва ишлаб чиқариш мажмуаси 65 миллион сўм, Қумқўрғон туманидаги «Сурхонкасадка» фермер хўжалиги 20 миллион, Олтинсой туманидаги «Олтинсойфарел» фермер хўжалиги 15 миллион 800 минг сўм кредит маблағи эвазига балиқ етиштириш ҳажмини ошириш имкониятига эга бўлди.
Хусусан, вилоятда 2012 йил 854 тонна маҳсулот ишлаб чиқарилган бўлса, 2013 йили 223 хўжалик юритувчи субъект томонидан 1 266 тонна балиқ етиштирилди. «Аму-Сурхон» ирригация тизимлари ҳавзаси бошқармаси қошидаги балиқчилик хўжаликлари, Музработ туманидаги «Меҳнат-роҳат» хусусий корхонаси, Бойсун туманидаги «Қумсой», Сариосиё туманидаги «Тўпаланг олтин балиқ», Термиз туманидаги «Норҳамид бобо», Узун туманидаги «Баротбой Мамасодиқ», Жарқўрғон туманидаги «Ғанишер балиқчи» каби кўплаб фермер хўжаликлари яхши кўрсаткичларга эришмоқда.
Вилоят балиқчилари 5 503 гектар табиий ва сунъий кўлларда маҳсулот етиштириб, арзон нархларда истеъмолчиларга етказиб бермоқда. Айни пайтда янги мавсум учун сазан, карп, дўнгпешона, оқ амур каби балиқ чавоқлари парваришланмоқда.
Сурхондарё вилоятида балиқ етиштиришнинг арзон ва интенсив усули жорий этилаётгани соҳани молиявий барқарор, истиқболли тармоққа айлантиришда муҳим аҳамият касб этмоқда. Мутахассисларнинг фикрича, янги усулда балиқ парваришлаш маҳсулот таннархини арзонлаштириб, аҳолини табиий озиқ-овқат билан таъминлаш кўламини янада кенгайтиради. Бу йил вилоятда етиштириладиган балиқнинг 1 200 тоннаси истиқболли интенсив усулда парваришланаётгани бунга яққол мисолдир.
«Аму-Сурхон» ирригация тизимлари ҳавзаси бошқармаси қошида иккита фермер хўжалиги ва 12 масъулияти чекланган жамият шаклидаги балиқчилик хўжалиги фаолият кўрсатмоқда. Янги мавсумда улар интенсив усулда балиқ парваришлашни кенг жорий этмоқда.
– Интенсив балиқ етиштириш тежамкор ва қулай эканлиги катта қизиқиш уйғотди, – дейди «Жанубий Сурхон» сув омбори раҳбари Эркин Саидмуродов. – Бу усулда балиқ чавоқлари ишончли парваришланиб, кам харажат сарф этилади. Жорий йилги мавсумда 65 минг дона тез ривожланадиган дўнгпешона балиқ чавоқлари парваришламоқдамиз. Хўжалигимизда ўн нафардан ортиқ ёшларнинг бандлиги таъминланган.
Изоҳ (0)