3—10 апрел кунлари Ўзбекистон Республикаси Вазирлар Маҳкамасининг 2014-йил 18 мартдаги №10/103-82-сонли тасдиқланган Дастури доирасида Германиянинг «Фриэденсдорф Интернатионал» халқаро ташкилоти мутахассислари бемор болаларни тиббий кўрикдан ўтказади. Бу ҳақда «Соғлом авлод учун» Халқаро хайрия жамғармаси матбуот маркази хабар берди.
4 апрел куни Жиззах ва Сирдарё (Жиззах шаҳри вилоят кўптармоқли болалар тиббий марказида), 5 апрелда Қорақалпоғистон Республикаси, Самарқанд ва Навоий (Самарқанд шаҳри вилоят кўптармоқли болалар тиббий марказида), 6 апрелда Қашқадарё ва Сурхондарё (Қарши шаҳри вилоят кўптармоқли болалар тиббий марказида), 7 апрелда Бухоро, Навоий ва Хоразм (Бухоро шаҳри вилоят кўптармоқли болалар тиббий марказида) вилоятларидаги бемор болалар тиббий кўрикдан ўтказилади.
Шунингдек 8—9 апрел кунлари Фонднинг тиббий-ижтимоий маркази (Юнусобод тумани Ш.Рашидов кўчаси 94а-уй)да Фарғона, Андижон, Наманган, Тошкент вилояти ва Тошкент шаҳридаги бемор болаларни тиббий кўрикдан ўтказади.
Тиббий кўрик натижаларига кўра энг оғир деб топилган бемор болалар жорий йилнинг август ойида Германиянинг нуфузли клиникаларида даволаниш учун 6 ойдан 3 йилгача бўлган вақтга жўнатилади.
2002-йилда «Соғлом авлод учун» халқаро хайрия фонди, Ўзбекистон Республикаси Соғлиқни сақлаш вазирлиги, Германиянинг «Фриэденсдорф Интернатионал» халқаро ташкилоти томонидан уч томонлама ҳамкорлик битими имзоланган. Германиянинг «Фриэденсдорф Интернатионал» халқаро ташкилоти 1967-йили ташкил топган бўлиб, 35 дан ортиқ давлатлар билан ўзаро ҳамкорлик қилади. Ҳамкорлик доирасида 12 ёшгача бўлган бемор ва ногирон болаларни даволаш ва реабилитация қилиш билан шуғулланадилар.
Изоҳ (0)